Алматыда мектепке дейінгі ұйым педагогтері қыш шеберханасы арқылы балалардың танымдық қабілеттерін дамыту мәселесін талқылады
2026 жылғы 16 қазанда Алматы қаласының Бостандық ауданындағы «Sana properties» ЖШС-не қарасты «Зердеш-3» бөбекжайында мектепке дейінгі білім беру ұйымдарының педагогтеріне арналған қалалық семинар өтті. Іс-шараны бөбекжай меңгерушісі Бекзат Нысанбаева ұйымдастырды.
Өнер мен педагогиканы тоғыстырған басқосу барысында қыш өнерінің бала тәрбиесіндегі маңызы сөз болды. Семинар балшықпен жұмыс істеудің балаларға қоршаған ортаны танып-білуге, шығармашылық қабілеттерін шыңдауға, бастамашылдығын арттыруға және еңбекке баулудың алғашқы дағдыларын қалыптастыруға мүмкіндік беретінін көрсетті.
Семинарға қалалық мектепке дейінгі білім беру ресурстық орталығының әдіскері Ақбота Мұстафаева, Бостандық ауданының білім бөлімінің бас маманы Ансаған Дәулетқызы, аудандық әдістемелік бірлестіктің мүшелері, әдіскерлер мен балабақша тәрбиешілері қатысты.
Кездесудің мақсаты – қыш өнерінің балалардың танымдық қабілеттерін дамытудағы мүмкіндіктерін ашу, олардың шығармашылық әлеуетін қолдау және педагогтер арасында тәжірибе алмасуға қолайлы орта қалыптастыру.
Семинар бағдарламасы мазмұнды әрі тәжірибеге бағытталды. Қатысушылар қыш шеберханасының тыныс-тіршілігімен, оның мүмкіндіктерімен танысып, өзара жақынырақ танысуға арналған тренингке қатысты. Сондай-ақ педагогтерге қыш шеберханасының балалар үшін пайдасы мен балшықпен жұмыс істеудің бала дамуына ықпалы туралы мағлұмат берілді.
Практикалық бөлімде «Бәйтерек» ересек тобының тәрбиеленушілері қатысқан «Менің құмырам» атты шеберлік сағаты ұйымдастырылды. Балалар балшықпен жұмыс істеп, өз қиялдары мен шығармашылық қабілеттерін танытты. Сонымен қатар қаржылық сауаттылықтың алғашқы түсініктерін меңгеріп, адалдыққа, еңбекқорлыққа және түрлі мамандықтарға қызығушылық танытуға бағытталған дағдыларын дамытты.
Практикалық жұмыс аяқталған соң қатысушылар пікір алмасып, семинар тақырыбы бойынша кері байланыс жасады. Мұндай формат балалардың іс-тәжірибесін, педагогтердің әдістемелік байқауларын және кәсіби талқылауды өзара ұштастыруға мүмкіндік берді.
«Зердеш-3» бөбекжайы балалардың жан-жақты дамуына ықпал ететін шығармашылық бастамаларды қолдауды және педагогтердің кәсіби өсуіне үлес қосуды жалғастырады.
